「我明，但我做唔到」(下篇)

「明白」同「做到」，點解差咁遠？

你可以睇晒所有游水嘅書，明白換氣嘅原理，背得出每一個動作嘅步驟，

但第一次跳落水，個身體其實都仲係唔識游嘅。

唔係因為你唔夠聰明。

係因為身體有佢自己嘅學習方式 — 

需要重複、需要時間、需要喺真實嘅水裡面一次又一次練習，

先至會慢慢記住。

內在嘅改變都一樣。

你頭腦明白咗，但你嘅習慣、你喺壓力下嘅自動反應，

佢哋係唔係仲未學識？

好多人將「練習」等同於死頂嘅意志力，

一旦滑返舊模式就覺得自己失敗。

但如果，練習唔係關於「每次都做到」，

而係關於「覺察」呢？

覺察自己幾時滑落去，覺察係乜嘢觸發咗你。

當你開始「睇見」而唔急住怪自己，

係咪已經喺度練習緊？

做唔到，係咪代表「唔夠愛自己」？

有時有人會問：「明知對我好都唔做，係咪潛意識唔夠愛自己？」

不如我哋拆解下：乜嘢先係「自己」？

當你順從舊習慣、選擇當下嘅安逸，

其實你係非常「愛護」緊「當下嘅自己」。

面對未知，人好多時都會本能咁退後。

但同一時間，你確實犧牲咗「未來嘅自己」-- 

一個你其實一直想成為嘅自己。

呢種拉扯嘅來源，未必係缺乏自律，

而係內心兩個「自己」喺度角力。

你願唔願意，為咗成全「未來」更自由嘅自己，

邀請「當下」嘅自己承受少少不適？ 

唔係要逼自己，而係兩個「自己」之間嘅對話。

答案，從來唔喺「強迫」之中

內心嘅轉變，從來唔係一個頓悟，亦唔係一個開關掣。

可能真正重要嘅，從來唔係「點樣逼自己立刻做到」。

而係當你再次面對「做唔到」嘅無力感時，

可能唔使急住去搵「十個提高執行力嘅方法」。

而可能係停低問自己：

「我究竟喺抗拒緊乜？」

「我真正恐懼嘅係乜？」

「而我真正渴望嘅，又係乜？」

或者，當你唔再將「做唔到」睇成為一種失敗，某啲改變，反而會慢慢開始。

有時改變唔係突然跨過去。

而係你終於開始，唔再同自己打仗。   [本系列完結。歡迎重溫：]  👉「我明，但我做唔到」(上篇)