「你係我手下，我喺你手上」-- 職場關係嘅另類反思

喺香港打工，我哋好習慣將「波士」同「下屬」睇成係一種身份標籤。但當我哋靜低落嚟思考，或者當事情變得複雜，關係開始出現張力，呢個框架可能未必再足夠。

呢段關係入面最弔詭嘅地方，往往就藏喺呢句廣東話入面：

「你係我手下，我喺你手上。」

行政權力似乎由上而下，但最後係「攞彩」定「揹鑊」，往往都要透過下屬先真正落地。一段看似從屬嘅關係，亦顯露出一種互相依存。

致上司：你個「上司」嘅角色，係咪「名副其實」？有冇真正實踐出嚟？

喺儒家思想入面，有一個幾值得玩味嘅概念—正名。儒家講「正名」，其實唔係叫我哋去守規矩，而係問緊一個更深層次嘅問題：當我哋承擔起「上司」名分嘅時候，我哋嘅行為有冇撐起「上司」個「名」？

作為波士，我哋可以試吓反思：除咗張咭片之外，係乜嘢令我成為一個波士？

或者可以換個問法：一個人被稱為上司，究竟係因為佢嘅職位，定係因為佢喺關鍵時刻所展現出嚟嘅承擔？

如果我只係識得將上面嘅壓力原封不動咁壓落去，或者喺出事嘅時候第一時間搵人「揹鑊」，咁究竟有無履行到波士應有嘅行為呢?

作為上司，需唔需要贏得下屬嘅由衷尊重 (respect) 呢?

當一個手下遇到佢權限以外、處理唔到嘅困局，你能唔能夠運用你嘅位置去「開路」？當高層嘅無理要求好似支箭咁射落嚟，你能唔能夠用你嘅膊頭去擋一擋？呢種「擋箭」嘅動作，會唔會就已經係一種承擔？當你成全咗下屬，下屬先會幫你「正名」，對你由衷嘅尊重。

如果冇呢份承擔，下屬對你嘅尊重，會唔會喺你嘅一聲『你搞掂佢!』入面消失咗?

儒家兩千多年前已經講「名不正則言不順，言不順則事不成」。如果波士只係做個壓力嘅傳聲筒，而冇做過下屬嘅護盾，你覺得呢個名分，仲憑乜嘢去叫下屬幫你搏命？

致下屬：上司嘅信任，可能係你職場上真正嘅自由?

從另一邊睇，作為下屬，有時我哋都會問：點樣先可以令上司放心？點樣先可以有更多空間？一個常見嘅答案係「做好啲」，但如果再細緻啲睇，做好啲其實係指咩？係創意？係效率？

我哋可以諗吓，點解波士會 Micro-manage？點解佢會咁焦慮？好多時，呢種張力係源於缺乏信任。

信任與「低級錯誤」（Careless mistake）嘅反思 : 低級錯誤（Careless mistake）之所以傷，唔係因為個錯有幾大，而係因為佢體現咗一種「唔在乎」。當我哋交出一份錯漏百出嘅數據，我哋其實向對方傳遞緊一個訊息：「我冇放個心落去」。

或者可以反過來問自己：每一個低級錯誤出現時，我哋原本可以擁有嘅自由，係咪都一點一滴咁流失 ?

呢種對細節嘅放任，會唔會某程度上，反映緊我哋點樣看待自己? 如果你唔尊重自己交出嚟嘅嘢，你覺得人哋又會唔會尊重你呢？

相反，當你對自己做嘢質素有一份執著，你其實係同波士講緊：「呢件事喺我手上，你可以放心。」上司對你嘅信任，係源於一種長期累積嘅感覺：你交出嚟嘅嘢，係好少需要再睇多次或者大改？

一旦呢種信任建立咗，可能就係一種比較少被干預嘅空間——有人會叫佢做自由。

或者可以借用一個角度去睇——「義務論」（Deontology）令我哋思考一個好基本嘅問題：工作，到底係為咗取悅波士，定係對自己專業人格嘅一種交代？

斯多葛學派成日提醒我哋，要分清楚咩係我哋控制到，咩係控制唔到。職場入面有無數外在因素（無理客戶、公司政治）係我哋控制唔到嘅，但喺呢啲不可控嘅混亂入面，我哋反而可以諗清楚：

到底我哋係選擇互相拉扯，定係相互成全？

如果將呢段關係睇成一種修行——

對波士嚟講，會唔會睇到去支援、去成全下屬是否重要?

對下屬嚟講，又會唔會意識到要用心去守住自己嘅專業底線?

如果要搵一個比喻，呢種關係，可能更似一場雙人舞。如果波士肯「擋箭」，手下肯「用心」，呢段關係就唔再係一種「權力壓迫」，而可能昇華為「相互成全」。

最終，無論你嘅身份係波士定下屬，或者兩種身份都有，我哋都係喺職場入面，試圖活出一種有質素嘅自己。

你，會唔會覺得，

職場關係可以有另一種睇法?