「我明，但我做唔到」(上篇)

「我明，但我做唔到」——這之間，究竟隔住啲乜嘢？

喺輔導過程中，我成日聽到一種好誠實，但充滿無力感嘅聲音：

「其實你講嘅嘢我全部都明，我心底裡亦完全認同。

但一返到現實，我真係做唔到。」

當「認知」無法轉化為「行動」，我哋嘅第一反應往往係開始怪自己：

「我係咪太懶？意志力太薄弱？點解每次都係慾望戰勝理智？」

呢種「知易行難」嘅痛苦非常普遍。

但係，如果停低一陣，誠實咁問自己 —- 你真係唔想改變嗎？

定係，「想改變」同「能夠改變」之間，其實隔住一啲你未必睇得見嘅嘢？

「做唔到」，真係因為你「懶」嗎？

古希臘哲學家亞里士多德（Aristotle）曾經探討過一個千古難題：

意志軟弱（Akrasia）。

佢發現，一個人絕對可以喺理智上完全清楚乜嘢對自己最好，

但行為上依然背道而馳。

如果我哋真係徹底明白改變有好處，點解會抗拒？

我哋成日將「懶惰」當成敵人，

但試諗一諗：

如果嗰個拉住你唔俾你向前行嘅力量，其實係一個信差呢？

當你選擇拖延、停喺原地，你其實喺度保護緊自己啲乜嘢？

係咪有一種隱藏嘅恐懼：

怕改變會帶嚟失控？

怕付出咗得唔到回報？

定係怕一旦行出第一步，就要面對一個完全未知嘅人生？

會唔會，所謂嘅「懶」，只係一種用嚟掩飾不安嘅保護色？

理智，真係打得贏慾望嗎？

好多時，我哋期望用冷冰冰嘅「理智」去鞭打自己，

強行壓抑所有不理性嘅慾望。

但十八世紀哲學家大衛·休謨（David Hume）甚至提出：

「理性係情感嘅奴隸 。」

聽落去好似好極端，但試下諗一諗：

理智最多只能幫你分析利弊，話你知「放低執著會開心啲」。

但單靠大腦裡一張「道理清單」，點樣打得贏溫暖嘅安逸？

冰冷嘅「應該」，真係可以對抗嗰種想逃避嘅強烈情緒咩？

如果理智根本唔係用嚟「打壓」慾望，咁我哋係咪一直問錯咗問題？

與其問：「點先可以加強意志力？點先可以令自己改變？」

不如問：「我真正渴望嘅生活，究竟係乜嘢樣？

嗰份渴望，又有冇強烈到足以令你願意承受改變帶嚟嘅不安？」

👉下一篇：「我明，但我做唔到」(下篇)