你係唔係現代嘅奴隸？(中篇)

真正令你痛苦嘅，從來都唔係事情本身 —— 拆解內在嘅隱藏假設

喺上一篇「你有冇諗過，你，其實係一個現代嘅奴隸？」中，我哋講到現代人喺不知不覺中，將自己心靈嘅主權讓咗俾金錢、工作同外在評價。

一個人真正相信嘅信念，往往唔只係讀書讀返嚟嘅，而係從生命裡磨出來嘅。

愛比克泰德嘅哲學，正是如此。佢對人類苦難嘅洞察，唔係象牙塔裡嘅思辨——而係一個曾被真實枷鎖綁住嘅人，喺嗰啲枷鎖之中，佢反而睇見咗大多數自由人都睇唔到嘅嘢。

今次，我哋要跟隨奴隸哲學家愛比克泰德嘅視角，直面嗰啲我哋一直迴避嘅內心痛點。

愛比克泰德有一個觀察，犀利到有少少殘忍：

「會讓人不安嘅，唔係事情本身，而係我哋對事情嘅判斷同想法。」

等一等。唔好咁快跳過呢句。

你係咪即刻有個反應：「吓？唔係喎，係件事真係好衰㗎！唔係我想太多！」

對。你嘅感受係真實嘅。件事係發生咗嘅。

但係，試諗一諗：

同一件事——例如被老闆當眾批評——有人可以一笑置之，消化前行；但有人卻足足難受咗幾個月，甚至開始全面否定自己。

點解反應可以差咁遠？

愛比克泰德話，係因為我哋心裡都住著一套隱藏嘅假設——一套關於「世界應該點樣運作」、「我應該被點樣對待」、「我嘅價值係由乜嘢來決定」嘅內在信念。

我哋從未認真審視過佢，只係默默繼承咗佢 — 從父母、學校，到呢個叫我哋「要成功、要符合期望」，不停催促人要向前衝嘅文化。

因為呢啲信念太熟悉。熟悉到我哋以為佢就係「真理」。

例如：你係咪覺得，努力就一定應該有回報？冇回報，係咪就代表自己唔夠好？成功先值得人哋愛錫？有能力嘅人，係咪唔可以脆弱？

但現實世界，係咪一定咁樣運作？

有時你好努力，仍然會失敗。有時你好善良，仍然會被傷害。有時你做啱所有事情，結果仍然唔如預期。

然後，當現實唔符合呢套假設嘅時候，痛苦就嚟喇。

問題唔一定係件事本身有幾糟糕。問題係：你有冇意識到，係你內心嗰套隱藏嘅假設，一直喺悄悄地主宰住你嘅喜怒哀樂？

當然，審視內心假設，並唔等於叫你對外在世界嘅不公義視而不見。職場嘅不平等係真實嘅，社會嘅結構性困局係真實嘅。

愛比克泰德從唔否認外在世界嘅重量——佢只係提醒我哋：當我哋搞清楚自己內心發生乜嘢事，我哋先能夠以更清醒、更有力嘅狀態，去回應嗰個外在世界。

愛比克泰德相信，一個人願意認真去審視自己一直深信不疑嘅睇法嗰一刻，已經係邁向自由嘅第一步。

Recent Posts